Jetojmë në kohë sfidash të mëdha për njerëzimin dhe vetëm qasjet ndërdisiplinore me komponente të forta sasiore, matematikore dhe komputacionale do të mund të na ofrojnë zgjidhje të qëndrueshme dhe të sigurta. Ky aktivitet konsiston në seminare dhe referate shkencore gjatë 2 ditëve mbi aplikimet e modeleve matematikore dhe komputacionale për të adresuar probleme aktuale që hasen në shkencat e jetës, përfshirë biologjinë, mjekësinë, shëndetin publik.

Gjatë këtij takimi shkencor do të sillen eksperienca dhe rezultate nga specialistë të huaj dhe vendas dhe do të stimulohet debati konstruktiv për zhvillime të këtyre fushave në Shqipëri me të pranishëm nga gjithë aktorët e interesuar. Do të synohet aktivizim dhe shkëmbim idesh sidomos me brezin e ri studentor, dhe të kërkuesve shkencorë aktivë në vend, pjesëmarrja e të cilëve është esenciale në këtë takim. Aktiviteti do të zhvillohet i tëri online, në platformën Zoom. Gjuha dominuese e kontributeve do të jetë anglishtja, por të gjitha diskutimet edhe pyetjet mund të bëhen në shqip.